كتێبی (فتاوی معاصرة) یەكێكی ترە لە نوێترین كتێبەكانی پ.د. عەلی محێدین قەرەداغی، كە كۆكراوەی كۆمەڵێك فەتوای گرنگە و هۆكاری هەر فەتوایەكیش بەپێی فیقهی میزان ڕوون كراوەتەوە.

لەم كتێبەدا و لە فەتواكانیدا، نووسەر پشت دەبەستێت بە قورئان و سوننەت و هەڵێنجاندنی جڵەوگیركراو بە پێوەندە ئسوڵییەكان و فەتوای بەكۆمەڵی وڵاتان و كۆمەڵە ئیسلامییەكان.

سەرەتا نووسەر فەتوا دەناسێنێت و لە دادوەری كردن و هەڵێنجاندن جیای دەكاتەوە، پاشان حوكم و تایبەتمەندییەكانی فەتوا و فەتوادەریش نیشان دەدات. دواتر پەیوەندی فەتوا بە فیقهی میزانەوە ڕوون دەكاتەوە و هەریەكێك لە بابەتەكانی (پاكێتی (الطهارة) و پەرستشەكان و مامەڵە داراییەكان و ئابووریی ئیسلامی) لەبەر ڕۆشنایی فیقهی میزاندا دەردەخات.

لەوە بەدواوە نووسەر دەست دەكات بە وەڵامدانەوەی كۆمەڵێك پرسیار و فەتوادان لەسەریان بەپێی فیقهی میزان. لەم بابەتانەی خوارەوەدا:

• بابەتی پاكێتی: پاكیی مرۆڤ لەپاش مردنی، پاكیی مێروو، پیسیی سەگ، پاك كردنەوە بە ئامڕازە سەردەمییەكان، بەكارهێنانی ئاوی پیس... هتد.

• بابەتی نوێژ: پێشنوێژیی ئافرەت، نوێژی مردووی تێكەڵ، نوێژی ناو ئۆتۆمبێل، وتاردانی ئافرەت لە هەینیدا... هتد. كە بە وردی باس لە پێشنوێژیی ئافرەتان و بونیدنانی مزگەوتی تایبەت بە ئافرەتان و بەشداربوونی ئافرەتا لە پەرستشەكان دەكات.

• بابەتی ڕۆژوو: بەڕۆژوو بوونی منداڵ و بێ ئاوەز، گورچیلە شۆردن لە ڕەمەزاندا.. بەڕۆژوو بوون لەكاتی گەشتدا.. هتد.

• بابەتی سەر فیطرە و كەفارەت: دواخستنی سەرفیطرە، كاتی دەرهێنانی.. هتد.

• بابەتی زەكات: زەكاتی پشك، دواخستنی زەكات بۆ ڕمەزان، زەكاتی مووچە، زەكاتی زێڕ، زەكاتی پارەی زەخیرەكراو، زەكاتی قەرز، باج و سەرانە.

وردەكاریی سەرەكی لەبارەی كتێبەكەوە، ئەمانە دەگرێتەوە:

• زمانی كتێب: عەرەبی

• نووسینی: عەلی محێدین قەرەداغی

• ژمارەی لاپەڕە: 399

• ساڵی بڵاوبوونەوە: 2024