لە زانکۆی وان، پ.د. عەلی قەرەداغی وتارێکی زانستیی گرنگی لەسەر "فیقهی میزان" پێشکەش کرد

وان - بەیانیی ئەمڕۆ چوارشەممە، لە درێژەی سەردانە زانستییەکەیدا بۆ شاری وانی تورکیا، جەنابی پڕۆفیسۆر دکتۆر عەلی قەرەداغی، ئەمینداری گشتیی یەکێتیی جیهانیی زانایانی موسڵمان، وتارێکی زانستیی بەنرخی لەژێر ناونیشانی "فیقهی میزان" لە زانکۆی "یوزونجو یڵ وان" (Yüzüncü Yıl Üniversitesi) پێشکەش کرد.

وتارەکە، کە لە پەراوێزی کۆنفرانسێکدا لە کۆلێژی زانستە ئیسلامییەکان (إلهیات) ساز کرابوو، لەلایەن کەسایەتییە ئەکادیمییە باڵاکانەوە پێشوازیی لێکرا. لەنێو ئامادەبوواندا، هەریەک لە پ.د. حەمدوڵا شڤلی سەرۆکی زانکۆ، پ.د. عەبدولڕەحمان جاندار ڕاگری کۆلێژ، د. فایز عەزیز عەلی سەرۆکی یەکێتیی قوتابیانی عێراقی لە تورکیا، لەگەڵ ژمارەیەکی بەرچاو لە مامۆستایان و کۆمەڵێکی زۆری قوتابیانی کچ و کوڕ ئامادە بوون.

وتارەکە بووە جێگەی ڕەزامەندی و پێزانینی گشتیی ئامادەبووان، کە خۆشحاڵیی خۆیان بە ئامادەبوون لەم دیدارە زانستییەدا دەربڕی و سەرسامیی خۆیان بە شێواز و ناوەڕۆکە کاریگەرەکەی وتارەکە نیشان دا.

"فیقهی میزان"؛ پڕۆژەیەکی فیکریی چارەکە سەدەیەک

جێی ئاماژەیە، "فیقهی میزان" ناونیشانی نوێترین بەرهەمی فیکری و زانستیی جەنابی دکتۆر قەرەداغییە، کە زیاتر لە چارەکە سەدەیەکی لە نووسین و ئامادەکردنیدا بەسەر بردووە.

ئامانجی سەرەکیی ئەم کتێبە، یارمەتیدانی قوتابیان و توێژەرانە بۆ گەیشتن بە ئیجتیهادێکی هاوسەنگ، تێگەیشتنێکی هاوسەنگ، حوکمێکی هاوسەنگ و مامەڵەیەکی هاوسەنگ لەگەڵ دەقە شەرعییەکان و واقیعی ژیاندا.

یەكێكی تر لە چالاكییەكانی، پ.د. عەلی قەرەداغی لە شاری وان، بریتبوو لە کۆبونەوەی لەگەڵ سەرجەم موفتی و زانا و پێش نوێژ و وتارخوێنەکانی ناوشار و شارۆچکە و گوندەکانی شاری وان. لە میانەی دیدارەکەدا دکتۆر عەلی قەرەداغی وتارێکی پێشکەش کرد و لەسەر گرنگیی کار و ئەرک و ڕۆڵی زانایان دوا.