Aug 09 2025
زانکۆی گەشەپێدانی مرۆیی (UHD)
زانکۆی گەشەپێدانی مرۆیی (UHD) لە ساڵی ٢٠٠٨ لەسەر دەستی پڕۆفیسۆر دکتۆر عەلی قەرەداغی دامەزراوە. ئەم زانکۆیە دامەزراوەیەکی ئەکادیمیی تایبەت و قازانج نەویستە، کە وەک ناوەندێکی پێشەنگ لە بوارەکانی زانستە کۆمەڵایەتی و تەندروستییەکان و گەشەپێدانی مرۆییدا، لە ڕێگەی فێرکردن، توێژینەوە، نوێگەری و داهێنانی زانستییەوە، ڕۆڵی دیار دەگێڕێت.
زانکۆی گەشەپێدانی مرۆیی بە فەرمانی وەزاریی ژمارە (١٩٢١١/٣) لە ١٦ی کانوونی یەکەمی ٢٠٠٨، کە لەلایەن وەزارەتی خوێندنی باڵا و توێژینەوەی زانستیی حکومەتی هەرێمی کوردستانەوە دەرچووە، کراوەتەوە. هەروەها دانپێدانانی وەزارەتی خوێندنی باڵا و توێژینەوەی زانستیی عێراقیشی بەدەستهێناوە، بەپێی فەرمانی وەزاریی ژمارە (٦٦١٣) لە ٢٤ی ئەیلوولی ٢٠١٧. زانکۆکە ناوبانگێکی دیاری هەیە لە دابینکردنی ئەزموونێکی فێربوونی قوتابی-تەوەر و ئامادەکردنی قوتابیان بۆ بەدەستهێنانی سەرکەوتن لە بوارە پیشەییەکانیاندا. ئەمەش لە ڕێگەی هاندانی بیری پێشکەوتنخوازانە، سوودوەرگرتن لە تەکنەلۆژیای سەردەم، و گرنگیدان بە لایەنی کرداریی پسپۆڕییەکان.
زانکۆی گەشەپێدانی مرۆیی پابەندە بە بەشداریکردنێکی ئەرێنی و کاریگەر لە گەشەپێدانی پەروەردەیی و ئابووریی کۆمەڵگەدا، چ لەسەر ئاستی ناوخۆیی و چ لەسەر ئاستی گشتی. کار دەکات بۆ پاراستنی پێگەی پێشەنگی خۆی لە ڕووی کوالیتییەوە لەنێو زانکۆ تایبەتەکانی هەرێمی کوردستان-عێراقدا، و جەخت لەسەر درەوشانەوەی ناوی خۆی لە جیهانی ئەکاديمیدا دەکاتەوە. زانکۆکە پابەندە بە پاراستنی ستانداردە ئەکادیمییە بەرزەکان و بەرزکردنەوەی ئاستی فێرکردن، فێربوون و توێژینەوە، بە ئامانجی خزمەتکردنی کۆمەڵگەی ناوخۆیی، نیشتمانی و نێودەوڵەتی. هاوکات کاردەکات بۆ پەرەپێدانی ئەو پڕۆگرامانەی کە لەگەڵ پەیامی زانکۆدا هاوتەریبن.
زانکۆی گەشەپێدانی مرۆیی باشترین دەرفەت بۆ قوتابییەکانی دەڕەخسێنێت، بۆ ئەوەی توانستە فیکری، ئەکادیمی و پیشەییەکانیان بەگەڕبخەن و پەرەی پێبدەن، تا ببنە تاکێکی بەرهەمهێنەر و هاووڵاتییەکی بەرپرس لە کۆمەڵگەدا.
